naqsh-e-dīvār vo sūrat bhī ga.ī
merī āñkhoñ kī vo vahshat bhī ga.ī
vo diyā bujh gayā mere andar
vo havāoñ se raqābat bhī ga.ī
jāñ-sipārī ke bahut da.ave the
ab to jiine kī nadāmat bhī ga.ī
sa.ī-e-āsūdgī-e-vasl to kyā
girya-e-shab kī vo fursat bhī ga.ī
din ko saa.e se to kuchh saath bhī the
raat ko phir ye rifāqat bhī ga.ī
jin se zinda the zamīr-o-ehsās
ab vo andar kī malāmat bhī ga.ī
sar bhī rusvā haiñ ki saudā na rahā
sañg-e-dīvār kī izzat bhī ga.ī