kaalī rātoñ ko bhī rañgīn kahā hai maiñ ne
terī har baat pe āmīn kahā hai maiñ ne
terī dastār pe tanqīd kī himmat to nahīñ
apnī pā-posh ko qālīn kahā hai maiñ ne
maslahat kahiye use yā ki siyāsat kahiye
chiil kavvoñ ko bhī shāhīn kahā hai maiñ ne
zā.iqe bārhā āñkhoñ meñ mazā dete haiñ
ba.az chehroñ ko bhī namkīn kahā hai maiñ ne
tū ne fan kī nahīñ shajre kī himāyat kī hai
tere e.azāz ko tauhīn kahā hai maiñ ne