chamakte lafz sitāroñ se chhīn laa.e haiñ
ham āsmāñ se ġhazal kī zamīn laa.e haiñ
vo aur hoñge jo ḳhanjar chhupā ke laate haiñ
ham apne saath phaTī āstīn laa.e haiñ
hamārī baat kī gahrā.ī ḳhaak samjheñge
jo parbatoñ ke liye ḳhurdbīn laa.e haiñ
hañso na ham pe ki har bad-nasīb banjāre
saroñ pe rakh ke vatan kī zamīn laa.e haiñ
mire qabīle ke bachchoñ ke khel bhī haiñ ajiib
kisī sipāhī kī talvār chhīn laa.e haiñ