ḳhuub mushkil hai par āsān liyā jaatā hai
kitnā halke meñ ye insān liyā jaatā hai
nazreñ milte hī vo nazroñ ko jhukā lete haiñ
is ko iz.hār kā imkān liyā jaatā hai
ham to kahte haiñ mohabbat meñ maza hai hī nahīñ
aap kahte haiñ to phir maan liyā jaatā hai
ye havas hī hai hameñ jis ne nachā rakkhā hai
ishq to duur se pahchān liyā jaatā hai
aap ne bhuul kar ham ko jo sukūñ baḳhshā hai
aap kā āḳhirī ehsān liyā jaatā hai