dil mirā be-qarār rahtā hai
ik tirā intizār rahtā hai
ik musāfir ke paañv meñ chhāle
aur rasta ġhubār rahtā hai
vo satāyā huā mohabbat kā
har jagah darkinār rahtā hai
ghar meñ laḌkī javāñ huī hai kyā
fikr ab be-shumār rahtā hai
mere sapne meñ aatā hai aksar
vo jo nadiyā ke paar rahtā hai
vo kaTā sā rahā zamāne se
us ke dil meñ ġhubār rahtā hai
jo muhājir kaTā kaTā sā thā
ghar meñ vo taar taar rahtā hai