umr bhar ba-āsānī bār-e-ġham uThāne se

un pe e'tibār aayā ḳhud ko āzmāne se

is hujūm meñ tujh ko kyā ḳhabar huī hogī

kis ko kyā ta.alluq thā tere āstāne se

yuuñ salām aane par ik ḳhalish sī hotī hai

kaash ham ko bulvāte vo kisī bahāne se

haañ to un kī ḳhātir se kyuuñ tarāvasheñ karte

jis tarah vahāñ guzrī kah ga.e zamāne se

jab bhī bazm-e-ālam meñ koī fitna uThtā hai

yā tumhārī mahfil se yā ġharīb-ḳhāne se

silsila yahī hogā ruḳh badalte jā.eñge

maiñ tirī haqīqat se tū mire fasāne se