apne jauhar se sivā bhī koī qīmat māñge

dil vo ā.īna nahīñ hai ki jo sūrat māñge

maiñ ne dariyāoñ meñ bhī dasht kā manzar dekhā

jab ki pyāsā koī paanī kī ijāzat māñge

us kī raftār kī tasvīr banā.ī na ga.ī

kis qayāmat ko ye hañgām qayāmat māñge

naaz kī qāmat-e-zebā kī bayāñ kyā kiije

pairahan bhī jahāñ uslūb-e-nazākat māñge

jitnā hotā hai kam āsār-e-ḳhushī kā lamha

dil mirā dard se utnī bhī na mohlat māñge

har taraf shor hai āvāzoñ kā tasvīroñ kā

kaun ghabrā ke na ab gosha-e-uzlat māñge

ḳhvāb utre haiñ mire zehn pe jaise ilhām

kaun in ḳhvāboñ se ta.abīr kī qīmat māñge

kaun maslūb huā kis pe lagā hai ilzām

kashmakash aisī hai insāf adālat māñge