ḳhvāboñ kī tilsmātī guphāoñ se nikal ke

dekho kabhī vīrāna-e-jāñ aañkh ko mal ke

har lamha hai ik ā.ina-e-umr-e-guzishta

peshānī-e-imroz pe bhī zaḳhm haiñ kal ke

tai ho na sakā marhala-e-dasht-e-tamannā

dīvār banī paañv kī zanjīr pighal ke

ik roz to ye dil kī taḌap lab pe bhī aa.e

ik roz to ye sāġhar-e-labrez bhī chhalke

dekhā jo kabhī dil ke darīche meñ simaT kar

sadiyāñ mileñ simTī huī āġhosh meñ pal ke

haijān se haiñ gūñjī huī dhyān kī galiyāñ

dil meñ utar aa.e haiñ nigāhoñ ke dhundalke

'ḳhāvar' abhī kuchh yaad kī sham.eñ haiñ farozāñ

raushan haiñ dar-o-bām abhī merī ġhazal ke