ik ḳhalish ik karb pinhāñ merī ḳhākistar meñ hai
merā dushman hādisa ye hai ki mere ghar meñ hai
kaun kis ke ashk poñchhe kaun kis kā dukh baTā.e
jo hai vo mahrūmiyoñ ke gumbad-e-be-dar meñ hai
zarb-e-tesha chāhiye aur dast-e-āzar chāhiye
ik jahān-e-ḳhāl-o-ḳhad ḳhvābīda har patthar meñ hai
is zamāne meñ mirī sāda-dilī merā ḳhulūs
ek manzar hai magar be-rabt pas-manzar meñ hai
bech dī 'ḳhāvar' yahāñ yāroñ ne nāmūs-e-vafā
tū bhī pyāre kis bhulāve meñ hai kis chakkar meñ hai