vo ḳhud-parast hai aur ḳhud-shanās maiñ bhī nahīñ
fareb-ḳhurda-e-vahm-o-qayās maiñ bhī nahīñ
fazā-e-shahr-e-talab hai anā-guzīda bahut
adā-shanās-e-rah-e-iltimās maiñ bhī nahīñ
maiñ kyuuñ kahūñ ki zamāna nahīñ hai raas mujhe
maiñ dekhtā huuñ zamāne ko raas maiñ bhī nahīñ
vo faisle kī ghaḌī thī kaḌī so biit ga.ī
bichhaḌ ke tujh se kuchh aisā udaas maiñ bhī nahīñ
ye vāqi.a ki tujhe khal rahī hai tanhā.ī
ye hādisa ki tire ās-pās maiñ bhī nahīñ
huā kare jo hai 'ḳhāvar' fazā ḳhilāf mire
asīr-e-halqa-e-ḳhauf-o-hirās maiñ bhī nahīñ