tez ho jaa.eñ havā.eñ to bagūlā ho jā.ūñ

ghūmte ghūmte ham-raqba-e-sahrā ho jā.ūñ

ḳhud-kalāmī mirī aadat nahīñ majbūrī hai

yuuñ na masrūf rahūñ maiñ to akelā ho jā.ūñ

dūsrā paañv uThāne kī zarūrat na paḌe

aur maiñ fāteh-e-nāhīd-o-surayyā ho jā.ūñ

band āñkhoñ se na kar mashq-e-tasavvur din-rāt

ki hamesha ke liye jaan maiñ terā ho jā.ūñ

ye tirī gul-badanī ye tirī kam-pairahanī

sair-chashmī se kahīñ aur na pyāsā ho jā.ūñ

ik sirā hai magar aatā nahīñ hāthoñ meñ 'zubair'

jis bahāne se maiñ be-gāna-e-duniyā ho jā.ūñ