sar kabhī gardan kabhī ruḳhsār sahlātā rahā
ek hī jhoñkā palaT kar baar baar aatā rahā
phuul par baiThī huī titlī achānak uḌ ga.ī
ye ḳhazāna āḳhir apne haath se jaatā rahā
sham.a kī lau par havā ne hoñT apne rakh diye
vajd meñ aa kar dhuāñ tā-der lahrātā rahā
is tamannā meñ ki ahl-e-dil mujhe tujh sā kaheñ
terā ik ik rañg ik ik Dhañg apnātā rahā
yuuñ ki dohrī zindagī jiine kī aadat thī mujhe
ḳhud ko siine se lagātā aur Thukrātā rahā
dar darīche band aur āñkheñ khulī rakhte hue
maiñ bhare ghar meñ gum apne aap ko paatā rahā