husn-e-sad-rañg se firdaus ba-dāmāñ niklā
ham ne jis phuul ko dekhā vo gulistāñ niklā
ho ga.e dād-talab aur balāoñ meñ asiir
hashr ik silsila-e-zulf-e-pareshāñ niklā
aur kyā shai hai ye me.arāj-e-mohabbat ke sivā
aarzū aap kī ho kar mirā armāñ niklā
ḳhaak meñ gardish-e-daurāñ ne milāyā mujh ko
aur is par bhī maiñ sar-halqa-e-daurāñ niklā
uf re ye jazba-e-ḳhuddār 'munavār' kī numūd
ik ajab shaan kā shā.ir ye suḳhan-dāñ niklā