milā thā roz-e-azal zauq-e-kāmyāb mujhe
mirī nazar ne kiyā ḳhud hī intiḳhāb mujhe
na e'tibār mire zarf kā thā saaqī ko
kabhī na bhar ke diyā sāġhar-e-sharāb mujhe
havā-e-dahr se bikhrā hai dil kā shīrāza
varaq varaq nazar aatī hai ye kitāb mujhe
maiñ apnī ḳhāmī-e-tarz-e-bayāñ pe nādim huuñ
mirā savāl hī ḳhud ban gayā javāb mujhe
kiyā hai dīda-e-anjām maiñ ne āgah-e-rāz
bisāt-e-dahr 'munavār' hai farsh-e-ḳhvāb mujhe