āñdhī meñ bisāt ulaT ga.ī hai

ghanghor ghaTā bhī chhaT ga.ī hai

vo gard uḌaa.ī hai dukhoñ ne

dīvār-e-hayāt aT ga.ī hai

ḳhanjar kī tarah thī reg-e-sahrā

ḳheme kī tanāb kaT ga.ī hai

mīrās-e-gulāb thī jo ḳhushbū

jhoñkoñ meñ havā ke baT ga.ī hai

pyāsoñ kā hujūm rah gayā hai

ik tiir se mushk phaT ga.ī hai

ik aur bhī din guzar gayā hai

mī.ād-e-azāb ghaT ga.ī hai

sāhil kī baḌhā ke tishnagī mauj

dariyā kī taraf palaT ga.ī hai

phailāuñgā paañv kyā maiñ 'gulzār'

chādar hī mirī simaT ga.ī hai