ye na samjho ġhubār haiñ ham log
ḳhushbuoñ kī qatār haiñ ham log
log ham ko ḳhizāñ samajhte haiñ
jab ki taaza bahār haiñ ham log
ye sharāfat nahīñ to phir kyā hai
dushmanoñ par nisār haiñ ham log
vo bhī kāñToñ se kam nahīñ haiñ kuchh
jin kī nazroñ meñ ḳhaar haiñ ham log
thoḌā ham se bhī pyaar kar liije
qābil-e-e'tibār haiñ ham log
apnī hālat sañvar nahīñ saktī
buzdilī kā shikār haiñ ham log
aaj momin haiñ mā.il-e-pastī
is ke ḳhud zimmedār haiñ ham log
the kabhī tājdār ab 'ḳhurshīd'
dāman-e-tār-tār haiñ ham log