misl-e-bahisht-e-ḳhush-numā kaun-o-makān meñ
insān mubtalā hai ajiib imtihān meñ
bujhtī nahīñ hai koshish-e-dariyā ke bāvajūd
ye kaisī tishnagī hai mire jism o jaan meñ
vo dhuup meñ khaḌā hai baḌe itminān se
lau de rahā hai merā badan sā.ebān meñ
kyuuñ naam intisāb meñ likhkhā gayā mirā
kirdār jab nahīñ thā mirā dāstān meñ
is baar pastiyāñ bhī mayassar na ā.eñgī
shal ho ga.e jo bāl-o-par ūñchī uḌaan meñ
vābasta tujh se azmat-e-sher-o-suḳhan huī
is baat ko bhī rakhnā 'ḳhayāl' apne dhyān meñ