jaag uThīñ chiñghāḌtī maujeñ safīna chāhiye
chaar jānib maut hai himmat se jiinā chāhiye
mez par ik filoñ kā Dher zehnī karb ḳhauf
aadmī se kaam lene kā qarīna chāhiye
aag barsā.ī idhar insān par insān ne
aur harīfoñ ko udhar sahrā-e-sīnā chāhiye
is bhare bāzār is baġhdād se guzrā huuñ maiñ
maiñ yahāñ bhūkā huuñ mujh ko bhī dafīna chāhiye
dushmanoñ ko hī na kiije qatl is talvār se
dostoñ ke vāste bhī dil meñ kiina chāhiye