kam kam rahnā ġham ke surḳh jazīroñ meñ
ye jo surḳh jazīre haiñ sab ḳhūnīñ haiñ
kam kam bahnā dil dariyā ke dhāre par
ye jo ġham ke dhāre haiñ sab ḳhūnīñ haiñ
hijr kī pahlī shaam ho yā ho vasl kā din
jitne manzar-nāme haiñ sab ḳhūnīñ haiñ
har kūche meñ armānoñ kā ḳhuun huā
shahr ke jitne raste haiñ sab ḳhūnīñ haiñ
ek vasiyyat maiñ ne us ke naam likhī
ye jo pyaar ke naate haiñ sab ḳhūnīñ haiñ
kaun yahāñ is raaz kā parda chaak kare
jitne ḳhuun ke rishte haiñ sab ḳhūnīñ haiñ