va.ade jhūTe qasmeñ jhūTī
duniyā kī sab bāteñ jhūTī
khīñchī haiñ jo sachche dil se
vo be-nām lakīreñ jhūTī
us kī āñkheñ bol rahī haiñ
sab ḳhush-rañg shabīheñ jhūTī
amn ke saare sapne jhūTe
sapnoñ kī ta.abīreñ jhūTī
ham ne jin ko sachchā jaanā
niklīñ vo sab bāteñ jhūTī
aaj hameñ ma.alūm huā hai
guzre kal kī yādeñ jhūTī
dekho kaan na dharnā un par
dil kī sab āvāzeñ jhūTī
bas ik pyaar kā bandhan sachchā
aur 'baqā' sab rasmeñ jhūTī