chehre ko bahāl kar rahā huuñ
duniyā kā ḳhayāl kar rahā huuñ
ik kār-e-muhāl kar rahā huuñ
zinda huuñ kamāl kar rahā huuñ
vo ġham jo abhī mile nahīñ haiñ
maiñ un kā malāl kar rahā huuñ
ash.ār bhī dāvat-e-amal haiñ
taqlīd-e-bilāl kar rahā huuñ
tasvīr ko ā.īna banā kar
tashrīh-e-jamāl kar rahā huuñ
chehre pe javāb chāhtā huuñ
āñkhoñ se savāl kar rahā huuñ
kuchh bhī nahīñ dastaras meñ 'sarshār'
kyuuñ fikr-e-ma.āl kar rahā huuñ