ġhamoñ se bashar ko rihā dekhnā
sulagtī koī jab chitā dekhnā
guzarnā aqīdat se kuchh is tarah
ki patthar meñ apnā ḳhudā dekhnā
ye karnā duā ki lage na nazar
shajar jab koī tum harā dekhnā
na ho mutma.in sauñp kar kashtiyāñ
Dubo de na ye nāḳhudā dekhnā
bulandī pe ḳhud ko bhī paanā kabhī
samay kī badaltī adā dekhnā
hai mumkin natīja judā.ī bhī ho
magar ishq kī ibtidā dekhnā
na jaane ghaḌī kaun ho āḳhirī
hue farz saare adā dekhnā