kahīñ jo azm zarā hausla nikal aa.e

fasīl-e-ġham se nayā rāstā nikal aa.e

na pūchh mujh se tū us husn-e-dilrubā kī kashish

jidhar bhī dekhe vahāñ aa.ina nikal aa.e

kisī navāh kī bhī baat ho magar ai dost

miyān-e-bazm tirā tazkira nikal aa.e

maiñ māntā huuñ nahīñ tujh sā dūsrā koī

koī jo tere sivā dūsrā nikal aa.e

sināñ kī nok pe aa jaa.e gar mirā sar bhī

falak se ūñchā mirā martaba nikal aa.e

maiñ us ḳhudā.ī meñ zinda huuñ ik zamāne se

har ik galī se nayā ik ḳhudā nikal aa.e

'nabīl' is liye maiñ āshiqī se baaz aayā

jise bhī pyaar karūñ bevafā nikal aa.e