jab se ummīd bāñdhī patthar par
dhuul sī jam ga.ī muqaddar par
kis ne chādar dhueñ kī taanī hai
mere jannat-misāl manzar par
mere chāragaroñ ne rakkhā hai
ek ik rāste ko Thokar par
āsmāñ kī talab meñ kaT kar bhī
phaḌ.phaḌāte rahe barābar par
paas tīr-o-kamāñ ke hote hue
ḳhauf taarī hai mere lashkar par
jab ghaḌī imtihān kī aa.ī
maiñ ne rakh dī zabāñ aḳhgar par
qaid kamre meñ ho gayā huuñ 'nabīl'
pheñk kar maiñ galī se bāhar par