ulfat ke imtihāñ meñ aġhyār fail nikle
the paas ek ham hī jo jaañ pe khel nikle
teġh-o-sināñ ko rakh do āñkheñ laḌāo ham se
achchhī hai vo laḌā.ī jis meñ ki mel nikle
dekhā jo nuur us kā to khul ga.ī haiñ āñkheñ
duniyā-o-dīñ ke jhagḌe bachchoñ kā khel nikle
ummīd nekiyoñ kī rakkho na tum buroñ se
mumkin nahīñ khalī se hargiz jo tel nikle
kab kohkan se uTThā koh-e-girāñ se ulfat
in saḳhtiyoñ ko 'kaifī' kuchh ham hī jhel nikle