bharam khulne na paa.e bandagī kā
vo mātam kar rahe haiñ zindagī kā
ta.ajjub hai ḳhulūs-e-dostāñ par
nahīñ ġham dushmanoñ kī dushmanī kā
bhaḌak uThtī hai dil meñ ātish-e-ġham
ḳhayāl aatā hai jab un kī galī kā
abhī hai band aañkh insāniyat kī
abhī dam ghuT rahā hai aadmī kā
tumhārī yaad ne kī rahnumā.ī
ḳhayāl aayā mujhe jab be-ḳhudī kā
lagī dil kī ho alfāz-o-bayāñ meñ
yahī ek ḳhaas fan hai shā.irī kā
vahī dushman bane baiThe haiñ 'maikash'
jo dam bharte the apnī dostī kā