jab apnoñ se duur parā.e des meñ rahnā paḌtā hai

sān-gumān na hoñ jis kā vo dukh bhī sahnā paḌtā hai

ḳhud ko mārnā paḌtā hai is aaTe daal ke chakkar meñ

do kauḌī ke aadmī ko bhī sāhab kahnā paḌtā hai

banjar hotī jaatī ho jab pal pal yādoñ kī vaadī

dariyā ban kar apnī hī ā.ankhoñ se bahnā paḌtā hai

mahrūmī kī chādar oḌhe tanhā qaidī kī mānind

ḳhālam-ḳhālī dīvāroñ ke andar rahnā paḌtā hai

bāteñ karnī paḌtī haiñ dīvār pe baiThe kavve se

is chiḌiyā se saare din kā qissa kahnā paḌtā hai