jab bhī Duube hue sūraj ne ubharnā chāhā
shahr vāloñ ne bhī galiyoñ meñ bikharnā chāhā
aaj kāñToñ se ulajhtā hai garebāñ us kā
jis ne sabze pe kabhī paañv na dharnā chāhā
ho ga.iiñ sūrat-e-dīvār havā.eñ haa.el
jab kisī ashk ne dāman pe utarnā chāhā
chāñdnī-shab thī ki maiñ thā ki havā ke saa.e
har kisī ne tire kūche meñ Thaharnā chāhā
le gayā 'kaif' salīboñ ko uThā kar koī
ġham ke māroñ ne kisī vaqt jo marnā chāhā