vo mirī bazm meñ aayā ho kabhī yaad nahīñ
hāl-e-dil khul ke sunāyā ho kabhī yaad nahīñ
ik sar-e-rāh mulāqāt to taslīm magar
ḳhalvatoñ meñ bhī bulāyā ho kabhī yaad nahīñ
qahqahe chhīn ke aañsū mujhe dene vaale
maiñ ne tujh ko bhī rulāyā ho kabhī yaad nahīñ
jo zamāne meñ mire naam se jaanā jaa.e
haq koī us ne jatāyā ho kabhī yaad nahīñ
nīndeñ rātoñ kī mirī jis ne churā liiñ 'jāved'
maiñ ne us ko bhī jagāyā ho kabhī yaad nahīñ