ḳhvāb ummīd se sarshār bhī ho jaa.e to kyā
dasht to dasht hai bāzār bhī ho jaa.e to kyā
ab kahāñ koī sitāroñ ko ginā kartā hai
merā har zaḳhm numūdār bhī ho jaa.e to kyā
so chukī shaam añdhere kā hai saaya dil par
aaj ḳhvāhish koī bedār bhī ho jaa.e to kyā
zindagī apnī na badlī hai na badlegī kabhī
ḳhāk-e-pā zīnat-e-dastār bhī ho jaa.e to kyā
manzileñ baḌhne lagīñ ḳhud hī musāfir kī taraf
rāsta sūrat-e-dīvār bhī ho jaa.e to kyā