ret ke shānoñ pe shabnam kī namī raat ga.e
aur kuchh tez huī tishna-labī raat ga.e
baam o dar jaag uThe shauq ne āñkheñ kholīñ
dil kī dahlīz pe dastak sī huī raat ga.e
mere siine meñ kisī aag kā jalnā din bhar
us ke hoñToñ pe vo halkī sī hañsī raat ga.e
ik isī ḳhvāb ne kyā kyā na tamāshā dekhā
niiñd ke haath meñ jaadū kī chhaḌī raat ga.e
fat.h paa.ī hai sarāboñ pe mire ashkoñ ne
ġham ne bāñdhī hai ka.ī baar nadī raat ga.e