havā bhī garm hai chhā.e haiñ surḳh bādal kyuuñ
ye zulm kis pe huā roī ḳhāk-e-maqtal kyuuñ
jo ḳhvāb dekhtī aa.ī huuñ apne bachpan se
adhūrā ḳhvāb vo hotā nahīñ mukammal kyuuñ
jo aarzū thī ki hoñ ird-gard gul-būTe
to tum ne nāg-phanī ke ugaa.e jañgal kyuuñ
ham apne shauq kī duniyā meñ gum the kuchh aise
samajh na paa.e ki bhīgā hai maañ kā āñchal kyuuñ
sukūt se bhī samundar ke ḳhauf aatā hai
haiñ kyuuñ ḳhamosh ye maujeñ nahīñ hai halchal kyuuñ
maiñ jab sukūn kī manzil se chand gaam pe huuñ
sadā.eñ detā hai maazī mirā musalsal kyuuñ
vo kaun apnā 'shifā' yaad aa gayā tum ko
tumhārī aañkh huī jā rahī hai jal-thal kyuuñ