us ḳhush-adā ke ā.ina-ḳhāne meñ jā.ūñgā
phir lauT kar maiñ apne zamāne meñ jā.ūñgā
rah jā.egī ye saarī kahānī yahīñ dharī
ik roz jab maiñ apne fasāne meñ jā.ūñgā
ye sub.h o shaam yūñhī raheñge mire charāg
bas maiñ tujhe jalāne bujhāne meñ jā.ūñgā
ye khel hai to ḳhuub magar tere haath se
is TūTne bigaḌne banāne meñ jā.ūñgā
yūñhī maiñ ḳhud ko ḳhvāb dikhāne meñ aa gayā
yūñhī maiñ ḳhud ko ḳhvāb dikhāne meñ jā.ūñgā