jaise in sajdoñ kā sar se rishta hai
bilkul aisā merā ghar se rishta hai
merī āñkheñ kuchh soī sī rahtī haiñ
shāyad in kā ḳhvāb-nagar se rishta hai
tujh ko kaise bhuul sakegā dil merā
terā merā to indr se rishta hai
ai shahzādī saath hamāre mat chalnā
banjāroñ kā dhuup safar se rishta hai
lauh-e-falak par likkhī hai jis kī izzat
ham logoñ kā us ke dar se rishta hai
jis ke saa.e meñ ham baḳhshe jā.eñge
ham logoñ kā us chādar se rishta hai
vo auroñ par sañg uchhāle nā-mumkin
'mājid' kā shīshe ke ghar se rishta hai