āsmāñ kī rif.atoñ se tarz-e-yārī siikh lo
sar uThā kar chalne vaalo ḳhāksārī siikh lo
pesh-ḳhema haiñ tanazzul kā takabbur aur ġhurūr
martaba chāho to pahle inkisārī siikh lo
ḳhud badal jā.egā nafrat kī fazāoñ kā mizāj
pyaar kī ḳhushbū luTāo mushkbārī siikh lo
chun lo qirtās o qalam yā teġh kar lo intiḳhāb
koī fan apnāo lekin shāhkārī siikh lo
phir tumhāre paañv chhūne ḳhud bulandī aa.egī
sab diloñ par raaj kar ke tāj-dārī siikh lo
ishq kā maidān āsāñ to nahīñ hai mohtaram
ishq karnā hī agar hai ġham-shi.ārī siikh lo
jis shajar kī chhāñv ho 'mājid' zamāne ke liye
kaise hogī is shajar kī ābiyārī siikh lo