jo sher tere ḳhat kī ibārat meñ kaam aa.e
vo hī mushā.eron kī nizāmat meñ kaam aa.e
laayā to thā maiñ aur kisī kaam se magar
shāyad ye phuul ab mirī mayyat meñ kaam aa.e
vo aa gayā thā merī giraft-e-vafā meñ par
us par fareb the jo zamānat meñ kaam aa.e
pheñkī hai mere ghar meñ mire dost ne jo iiñT
shāyad vo mere ghar kī marammat meñ kaam aa.e
ashkoñ kī jā.edād to kar dī ġhazal ke naam
jo qahqahe bache the musībat meñ kaam aa.e
haañ aise dost kī bhī zarūrat nahīñ mujhe
jo sirf aur sirf zarūrat meñ kaam aa.e