ab ye gul gulnār kab hai ḳhaar hai be-kār hai
aap ne jab kah diyā be-kār hai be-kār hai
chhoḌ kar matl.a ġhazal damdār hai be-kār hai
jab sipah-sālār hī bīmār hai be-kār hai
ik savāl aisā hai mere paas jis ke sāmne
ye jo terī shiddat-e-inkār hai be-kār hai
tujh ko bhī hai chāñd kā dīdār karne kī talab
ik diye ko raushnī darkār hai be-kār hai
mai-kade ke muḳhtalif ādāb hote haiñ 'charāġh'
jo yahāñ par sāhab-e-kirdār hai be-kār hai