adhūrā rah gayā majnūñ se istifāda mirā
so phir se dasht ko jaane kā hai irāda mirā
ajiib shāḳh thī sandal kī mujh se kahtī thī
bajā.e surma lagāyā karo burāda mirā
zarūratoñ kī kifālat usī ke zimme hai
jise ḳhayāl hai mujh se kahīñ ziyāda mirā
shaiḳh-e-nigāh tirī hāzirī ko chal niklūñ
havā-e-tauba sukhā de agar labāda mirā
tire nisār tire lutf-e-ḳhās ke qurbāñ
ki tere haath ne rakkhā hai dil kushāda mirā