tujh tak bachā ke laa.ī hai merī jabīñ mujhe
varna to dil-nashīñ the bahut kufr-o-dīñ mujhe
mujh ko vo chehra ḳhvāb meñ dekhā huā lagā
dekhā huā thā us ne bhī shāyad vahīñ mujhe
taqsīm karne vaale ne aisā karam kiyā
añgushtarī kisī ko milī aur nagīñ mujhe
mujh par atā-e-ḳhās hai sāñpoñ ke baab meñ
rakhtī hai ḳhud-kafīl mirī āstīñ mujhe
darbār meñ bulāyā gayā huuñ na jaane kyuuñ
aatā nahīñ kuchh bhī sivā.e nahīñ mujhe