niiñd meñ gungunā rahā huuñ maiñ
ḳhvāb kī dhun banā rahā huuñ maiñ
ek muddat se baaġh duniyā kā
apne dil meñ lagā rahā huuñ maiñ
kyā batā.ūñ tumheñ vo shahr thā kyā
jis kī aab o havā rahā huuñ maiñ
ab tujhe merā naam yaad nahīñ
jab ki terā patā rahā huuñ maiñ
aaj kal to kisī sadā kī tarah
apne andar se aa rahā huuñ maiñ
aisā murda thā maiñ ki jiine ke
ḳhauf meñ mubtalā rahā huuñ maiñ