pichhle baras tum saath the mere aur december thā
mahke hue din-rāt the mere aur december thā
chāñdnī-rāt thī sard havā se khiḌkī bajtī thī
un hāthoñ meñ haath the mere aur december thā
bārish kī būñdoñ se dil pe dastak hotī thī
sab mausam barsāt the mere aur december thā
bhīgī zulfeñ bhīgā āñchal niiñd thī āñkhoñ meñ
kuchh aise hālāt the mere aur december thā
dhīre dhīre bhaḌak rahī thī ātish-dān kī aag
bahke hue jazbāt the mere aur december thā
pyaar bharī nazroñ se 'farah' jab us ne dekhā thā
bas vo hī lamhāt the mere aur december thā