maiñ ne sochā thā mujhe mismār kar saktā nahīñ

aks to mujh par palaT kar vaar kar saktā nahīñ

aa.ina zāhir to kar saktā hai ḳhadd-o-ḳhāl ko

aa.ina ehsās kā iz.hār kar saktā nahīñ

merī chāhat aur hai mere masā.il aur haiñ

ḳhud ko maiñ har baat par tayār kar saktā nahīñ

ḳhud se samjhautā kiyā hai zindagī ke naam par

is se baḌh kar zindagī ko pyaar kar saktā nahīñ

yā to apne jism kī had se nikalnā chhoḌ de

saaya hai to dhuup se inkār kar saktā nahīñ

kashtiyāñ bhī chāhiye aur nāḳhudā bhī chāhiye

tū samundar tair kar to paar kar saktā nahīñ

is se behtar hai ki ye azm-e-safar hī chhoḌ de

rāste ko tū agar hamvār kar saktā nahīñ