sachchā.iyoñ ko bar-sar-e-paikār chhoḌ kar
ham aa ga.e haiñ dasht meñ ghar-bār chhoḌ kar
āñkhoñ meñ jāgte hue ḳhvāboñ kā kyā kareñ
nīndeñ chalī ga.iiñ hameñ bedār chhoḌ kar
ham be-ḳhudī meñ kaun sī manzil pe aa ga.e
Thahrā huā hai vaqt bhī raftār chhoḌ kar
sāhil kise batā.e yahāñ apne dil kā dard
maujeñ chalī ga.iiñ use har baar chhoḌ kar
lāzim nahīñ ki aql kī har baat Thiik ho
ab maan lo jo dil kahe takrār chhoḌ kar
is ke sivā ab aur to pahchān kuchh nahīñ
jā.ūñ kahāñ maiñ apnā ye kirdār chhoḌ kar
shāyad isī malāl meñ vo dhuup Dhal ga.ī
saaya chalā gayā kahīñ dīvār chhoḌ kar
ab vādī-e-ḳhayāl meñ tanhā khaḌā huuñ maiñ
jaane kahāñ ga.e mujhe ash.ār chhoḌ kar