ḳhvāhishoñ se valvaloñ se duur rahnā chāhiye
jazr-o-mad meñ sāhiloñ se duur rahnā chāhiye
har kisī chehre pe ik tanhā.ī likkhī ho jahāñ
dil ko aisī mahfiloñ se duur rahnā chāhiye
varna vahshat aur sukūñ meñ farq kyā rah jā.egā
bastiyoñ ko jañgaloñ se duur rahnā chāhiye
is tarah to aur bhī dīvāngī baḌh jā.egī
pāgaloñ ko pāgaloñ se duur rahnā chāhiye
jo ġhubār-e-rāh-e-māzī meñ kahīñ gum ho ga.e
un bhaTakte qāfiloñ se duur rahnā chāhiye
kyā zarūrī hai ki apne-āp ko yakjā karo
TuuTe bikhre silsiloñ se duur rahnā chāhiye