ḳhvāhish-e-parvāz hai to bāl-o-par bhī chāhiye
maiñ musāfir huuñ mujhe raḳht-e-safar bhī chāhiye
is qadar bhī rañj kā ḳhūgar nahīñ huuñ maiñ abhī
rāste meñ dhuup ho to ik shajar bhī chāhiye
yuuñ mukammal ho nahīñ saktā koī bhī aks ho
aa.ina bhī chāhiye zauq-e-nazar bhī chāhiye
sirf sāñsoñ kā tasalsul hī nahīñ hai zindagī
apne hone kī hameñ koī ḳhabar bhī chāhiye
dostoñ kī is adā par ho gayā qurbān maiñ
merī pagḌī le chuke ab merā sar bhī chāhiye
mutma.in sahrā meñ aa ke bhī nahīñ tanhā.iyāñ
shaam hote hī inheñ dīvār-o-dar bhī chāhiye