ek na.e sāñche meñ Dhal jaatā huuñ maiñ
qatra qatra roz pighal jaatā huuñ maiñ
jab se vo ik sūraj mujh meñ Duubā hai
ḳhud ko bhī chhū luuñ to jal jaatā huuñ maiñ
ā.īna bhī hairānī meñ Duubā hai
itnā kaise roz badal jaatā huuñ maiñ
mīThī mīThī bātoñ meñ ma.alūm nahīñ
jaane kitnā zahr ugal jaatā huuñ maiñ
ab Thokar khāne kā mujh ko ḳhauf nahīñ
girtā huuñ to aur sambhal jaatā huuñ maiñ
akasr ab apnā pīchhā karte karte
ḳhud se kitnī duur nikal jaatā huuñ maiñ