usī harīf kī ġhārat-garī kā Dar bhī thā
ye dil kā dard magar zād-e-rahguzar bhī thā
ye jism-o-jān tirī hī atā sahī lekin
tire jahān meñ jiinā mirā hunar bhī thā
isī pe shahr kī saarī havā.eñ barham thiiñ
ki ik diyā mire ghar kī muñDer par bhī thā
mujhe kahīñ kā na rakkhā safed-poshī ne
maiñ gard gard uThā thā to mo'tabar bhī thā
isī khañDar meñ mire ḳhvāb kī galī bhī thī
galī meñ peḌ bhī thā peḌ par samar bhī thā
maiñ surḳh-rū thā ḳhudā.ī ke rū-ba-rū 'yūsuf'
ki us kī chaah kā ilzām mere sar bhī thā