sheḳh ne nāqūs ke sur meñ jo ḳhud hī taan lī

phir to yāroñ ne bhajan gaane kī khul kar Thaan lī

muddatoñ qaa.im raheñgī ab diloñ meñ garmiyāñ

maiñ ne photo le liyā us ne nazar pahchān lī

ro rahe haiñ dost merī laash par be-iḳhtiyār

ye nahīñ daryāft karte kis ne is kī jaan lī

maiñ to engine kī gale-bāzī kā qaa.il ho gayā

rah ga.e naġhme hudī-ḳhvānoñ ke aisī taan lī

hazrat-e-'akbar' ke istiqlāl kā huuñ mo'tarif

ta-ba-marg us par rahe qaa.im jo dil meñ Thaan lī