ḳhushī kyā ho jo merī baat vo but maan jaatā hai

mazā to behad aatā hai magar īmān jaatā hai

banūñ council meñ speaker to ruḳhsat qirāt-e-misrī

karūñ kyā membarī jaatī hai yā qur.ān jaatā hai

zavāl-e-jāh o daulat meñ bas itnī baat achchhī hai

ki duniyā meñ ba-ḳhūbī aadmī pahchān jaatā hai

na.ī tahzīb meñ diqqat ziyāda to nahīñ hotī

mazāhib rahte haiñ qaa.im faqat īmān jaatā hai

theater raat ko aur din ko yāroñ kī ye spēcheñ

duhā.ī laaT sāhab kī mirā īmān jaatā hai

jahāñ dil meñ ye aa.ī kuchh kahūñ vo chal diyā uTh kar

ġhazab hai fitna hai zālim nazar pahchān jaatā hai

chunāñ burdūñd sabr az dil ke qisse yaad aate haiñ

taḌap jaatā huuñ ye sun kar ki ab īmān jaatā hai