be-takalluf bosa-e-zulf-e-chalīpā lījiye

naqd-e-dil maujūd hai phir kyuuñ na saudā lījiye

dil to pahle le chuke ab jaan ke ḳhvāhāñ haiñ aap

is meñ bhī mujh ko nahīñ inkār achchhā lījiye

paañv pakaḌ kar kahtī hai zanjīr-e-zindāñ meñ raho

vahshat-e-dil kā hai iimā rāh-e-sahrā lījiye

ġhair ko to kar ke zid karte haiñ khāne meñ sharīk

mujh se kahte haiñ agar kuchh bhuuk ho khā lījiye

ḳhush-numā chīzeñ haiñ bāzār-e-jahāñ meñ be-shumār

ek naqd-e-dil se yā-rab mol kyā kyā lījiye

kushta āḳhir ātish-e-furqat se honā hai mujhe

aur chande sūrat-e-sīmāb taḌpā lījiye

fasl-e-gul ke aate hī 'akbar' hue behosh aap

kholiye āñkhoñ ko sāhab jām-e-sahbā lījiye